القائمة الرئيسية

الصفحات

إيمانه حطم غرورى :الفصل السادس
_السلام عليكم .
_وعليكم السلام .
_اتفضل اقعد يابشهندس .
_متشكر جداً يا أستاذه .
_أولاً عايزه أشكرك جداً على كل شئ قدمته ليَّ من غير ماتقصد .
ثانياً بقا عايزه حضرتك توعدنى إنك تسامحنى قبل ما أحكيلك أى شئ لأنى غلطت فى حقك غلطة كبيرة جداً
ومحتاجه ضميرى يستريح لأنى بجد تعبانه أوى وباتعذب بذنبك ده .




إيمانه حطم غرورى :الفصل السادس


_فى إيه يا أستاذه ؟ وليه بتقولى كدا !!.
_أنا أنا
_إنتِ إيه يأستاذه اتكلمى .
_وأخذت دموع عينيها  أن تنهمر وتتساقط .
_فى إيه وإيه سبب العياط  ده كله اتكلمى يا أستاذه  أرجوكِ .
_أنا اللى كنت  السبب فى حبسك .
_نعم السبب إزاى يعنى ؟
_أنا اللى زورت إمضتك على الورق ، أنا السبب فى كل اللى حصل .
أنا السبب أنا السبب .
_إهدى بس كدا
_طيب فهمينى ليه عملتِ كدا طيب ؟
_علشان أنتقم منك .
_تنتقمى منى ليه أنا عملتلك إيه ؟
_علشان كسرت غرورى .
كنت أول واحد تتجاهلنى بالشكل دا ، كرهت نفسي يوم ما حضرتك حسستنى إنى ولا حاجه ، لكن ربنا عصمك منى
أنا كنت جيالك دلوقتي السجن أعترفلك وأعترف على نفسى فى النيابة .
وفرحت جداً لما لقيتك موجود فى الشركة ، عارفه إنك مش هتسامحنى لأنى جيت عليك وظلمتك كتير .
_أنتِ عارفه نتيجة عملتك دى كان ممكن يحصل إيه ، كان من السهل جداً مستقبل أخويا يضيع .
وانا أجمل سنين عمرى تضيع فى السجن ووالدتى كان من السهل جداً يمكن تموت من القهر على ولادها ، أنتِ علشان تنتقمى من شخص مش أذاكِ فى أى حاجة كنتِ هتدمرى أسرة كاملة.
_عارفه والله إن غلطت وغلط كبير كمان .
بس صدقنى الغلطة دى فوقتنى وخلتنى وعد اللى واقفة قدامك دى .
لو مكنش حصل اللى حصل ده ماكنتش هاتغير ، لأن بسبب وفاة والدى وقتها حسيت إن ربنا بيعاقبنى على ذنبى فى حقك ووقتها حسيت قد إيه إنى كنت غلطانه وغلطانه وغلطانه اوى كمان .
عارفه إنى بطلب المستحيل وإنه صعب تسامحنى .
ماتعرفش إيه اللى حصلى من وقتها بس صدقنى أنا اتغيرت بجد وكل ده حضرتك السبب فيه علشان كدا أنا بشكرك جداً .
حتى لو مش سامحتنى هافضل مدينة ليك طول حياتى
بس ياريت ماتزعلش منى .
_بكل سهوله كدا عايزانى أسامحك وماأزعلش .
_أنا عارفه إنك لازم تزعل لأنك إنسان .
بس عايزه أقولك على شئ .
_اتفضلى .
مش حضرتك مؤمن بالأسباب .
_أيوه طبعاً .
_اعتبر غلطتى فى حقك دى سبب فى هدايتى ، أنا مش بابرر غلطى لنفسى .
بس عايزاك تعرف إن لما ربنا بيريد لشخص الخير بيهيأ
له الأسباب .
وأكيد ربنا جعلك سبب فى هدايتى لأنك إنسان مؤمن بربنا .
_ونعم بالله .
بس صدقينى اللى بتقوليه ده صعب وصعب اوى كمان .
_ربنا بيسامح يابشمهندس وفتحلى أبوابه رغم إنى ماكنتش أستحق ، لكن ربنا رحيم بيَّ وسامحنى وجعلك أنت وكل اللى حواليَّ سبب فى هدايتى .
أنا كنت ضايعه أووى ماكنتش عايشه وأخيراً لقيت نفسي .
_ربنا يصلح حالنا وحالك يارب ويرزقك الثبات .
_حضرتك هتسامحنى صح ؟
_إن شاء الله لأن ربنا بيسامح وكلنا بشر وبنغلط بس المهم إننا مانرجعش للغلط ده تانى .
وأتمنى أتمنىِ دى تكون توبة نصوحة.
أما الزعل ده أكيد هياخد وقته ويروح ، أستأذنك دلوقتي لأن عندى شغل .
_اتفضل ربنا معاك .
_خرج وليد من غرفة المكتب وهو لم يستوعب ماحدث كانت الدنيا تدور به لم يشعر بنفسه غير وهو جالس على المكتب يستند إلى الكرسى
إيه يا وليد ؟! مش مستوعب اللى سمعته .
هو أصلاً اللى قالته ده فيه عقل يستوعبه .
لا إله إلا الله يارب ارشدنى للخير لأنى بجد حاسس إن تايه وتعبان اوى
يارب أنا عارف إنك ليك حكمة فى كدا بس أنا بشر وباضعف قوى فقوينى وارزقنى الصبر .

_السلام عليكم .
_وعليكم السلام .
عامل إيه يامعتز ؟
_الحمدلله بخير ياوليد .
_يارب دايماً بخير  .
_أنا كنت عايزك فى موضوع وكنت ناوى أجيلك بعد الغدا لكن سبحان الله لينا نصيب نتقابل فى الطريق .
_تنورنى طبعا يامعتز فى أى وقت .
_خلاص نتقابل إن شاء الله فى صلاة العصر فى المسجد وبالمرة نتكلم فى موضوع كنت عايز آخد رأيك فيه كدا .
إن شاء الله فى رعاية الله .
_فى حفظ الله .

_حمدالله على السلامة ياوعد طمنينى ، عملتى إيه مع وليد ؟
_الحمدلله .
_مالك بتقوليها كدا من غير نفس يابنتى ؟
_لأنى لأول مرة أحس إنى ماقدرتش آخد اللى عايزاه طول عمرى متعودة بفلوسى آخد أى حاجه عايزاها .
لكن المرادى تختلف راحة الضمير والقلب دول مايتقدروش بمال الدنيا كلها .

_أفهم من كدا إن وليد ماسامحكيش .
_سامحنى بعد ماحكيت له على كل حاجة بس كلامه وجعنى اوى .
مش قادره أتخيل لو ربنا ماكنش وقف جانبه كان هيحصل إيه ؟
‏مسامحة وليد ليَّ مش مسامحة من القلب .
‏_إزاى يعنى قصدك تقولى إيه ؟
‏_وليد سامحنى بس علشانى اتغيرت ماحبش يخلينى أقنت من رحمة ربنا وحب يوصلى كدا علشان أثبت ومش انتكث .
‏فهمانى ؟
‏_ياااه يابنتى إنتِ دماغك راحت لبعيد أوى ياوعد
‏ماأعتقدش إنه يكون كدا ، أخلاق واحد زى ده أكيد تخليه يسامح .
‏_لا ياميتاب قولى هتخليه يسامح  ، اللى عملته فيه ماكنش سهل علشان ينتهى بالسرعة دى وكأنه لم يكن .
‏_بصى ياحبيبتى انا عايزاكِ تنسى الفترة دى وتركزى بقى فى الشغل وحياتك .
‏صحيح ياوعد نسيت أقولك أم حمزة إن شاء الله هتبدأ مجموعة جديدة للبنات فى المسجد وهياخدوا حلقات علم شرعى وكدا لو حابه تروحى .
‏_بجد اللهم بارك إن شاء الله هأروح من بكره بإذن الله
‏_الساعه كام طيب ؟
‏_الساعه أربعة كدا  .
‏_طيب تمام أكون رجعت من االشركة وهأعدى عليها
‏عايزه أسألك على حاجة كمان .
‏_بس كدا حاجتين تلاتة ياستى .
‏_ههههههه ربنا يسعدك يارب .
‏ماتعرفيش أكاديمية زاد دى بتفتح إمتى ؟
‏_ليه يادودو ؟
‏وإيه عرفك بيها ؟
‏_عرفتها ياستى من جروب أنا فيه ،  البنات بتتكلم عنها على النت وعايزه أقدم فيها .
‏_ماشاء  الله ده أجمل خير سمعته .
‏بصى ياستى هى بتفتح مرتين فى السنة ، تمام .
‏فلو حابه تقدمى تابعى هتفتح إمتى مع أم حمزة إن شاء الله .
‏هاتفيدك كمان وهتقدملك لو حبيتى .
‏إن شاء الله .
‏_إن شاء الله .
‏إيه الكلام خدنا ياست وعد مش هناكل ولا إيه ؟
‏أروح أقول لماما وعد مش عايزه تأكلنى .
‏_هششششششششششششششششش
‏‏كله إلا طنط تقول عليا بخيلة ولا إيه .
‏وبعدين كدا مش هترضى تجوزنى عمو .
‏_نعم نعم ياست وعد انتِ حاطه عينك على بابا ولا إيه ؟
‏_ايوه ، عندك اعتراض ؟
‏_هو أنا أقدر برضه .
‏_أيوه كدا اتعدلى أروح أجهز الغدا بقى بس هأصلى الأول .
‏_ماشى يا بطتى .
_االسلام عليكم ياهندسه
_وعليكم السلام يادكتره
_فكرتك مش هتيجى للعصر قولت يمكن راحت عليه نومة ولا  حاجة.
_بصراحك والله يامعتز مرهق وتعبان أوى وهأموت وأنام لكن للأسف الفكر هيخلى دماغى تنفجر .
‏_بصراحه ياوليد أنا لاحظت ده عليك وقت ماتقابلنا علشان  ‏كدا فضلت نتقابل هنا فى المسجد .
‏_يالا نصلى  وتحكيلى بعدها فى إيه .
‏_يالا ربنا يصلح الحال وييسر الأمور يارب .
‏_احكى بقا فى إيه ؟
‏_أنت هتاخدنى فى الكلام ولا إيه أنت اللى كنت عايز تقابلنى ليه ؟
‏_لا متشغلش بالك بيَّ دلوقتي وبعدين احنا مع بعض ياهندسه بعدين أقولك .
‏بس انت احكى فى إيه ؟ ‏لأنك بجد مش عاجبنى وده مش وليد اللى أعرفه .
‏_هحكيلك بس توعدنى إن محدش يعرف كلامنا ده .
‏_أوعدك طبعاً
‏_حكى وليد لمعتز ماحدث له من بداية معرفة وعد له فى الشركة إلى أن اعترفت وعد له بما فعلت .
‏_لا إله إلا الله
‏_أنا مش قادر أستوعب وحاسس إنى باسمع حكاية ياوليد .
‏_أمال أنا أعمل إيه طيب دا أنا دماغى هتنفجر من وقتها ومش عارف أعمل إيه .
‏_بص ياوليد اللى حصل ده كله ربنا مرتبه علشان يختبر صبرك وقوة إيمانك ويجعلك سبب فى هداية وعد .
‏_أنا معاك إن اللى عملِتُه ده ماكنش ينفع بس لازم نقف جانبها طالما اللى حصل حصل .
‏_أنت عارف كان ممكن يحصل إيه ؟
‏_ماقولنا ياهندسه بلاش نتوقع نتيجة لشئ ماحصلش
‏وبعدين حد يكره إبتلاء زى ده يكون نتيجته خير وسبب فى هداية شخص .
‏سامحها ياوليد وادعيلها بالهداية والثبات .
‏_أنا فعلاً سامحتها .
‏_أنت سامحتها بلسانك مش بقلبك .
‏_والله هحاول ، أنت عارف  إن حاجه زى دى محتاجه وقت لأن زى ما أنت عارف أثر الصدمة عليّ .
‏_تمام ربنا يصلح حالك وحالها وحالنا جميعاً .
‏_معتز انا بأفكر إنى أسيب شركة الشمس دى لأنى على الأقل مش هأقدر أروحها تانى الفترة دى .
‏_مش عارف أقولك إيه بس أنت فى النقطة دى اللى تقدر تحكم إن كنت تقدر تكمل ولا  .
‏بس لازم قبل ماتاخد قرار زى ده تعرف إنك لازم تلاقى بديل آخر .
‏بصراحة أنا قفلت من فكرة الشغل عند حد .
‏_قصدك إيه ؟
‏_قصدى إنى بأفكر أعمل شغل لنفسى وأبدأ أنا .
‏_يعنى حابب تعمل شركة ؟
‏_طبعاً الشركة دى أمر مفروغ منه لأنى نفسى فيها من زمان ، ولكن أنا لسه فى البداية وحابب أبدأ بحاجه بسيطه لحد ربنا مايكرمنى .
‏_فكرة ممتازة ، طيب إيه رأيك أبقى معاك ؟
‏_بجد يامعتز عندك استعداد تشاركنى ؟
‏_بجد ياهندسه عندى استعداد .
‏بص بقا أنا عندى حتة أرض كان بابا شاريها  ليَّ ابنى عليها مستشفى  فى المستقبل إن شاء الله .
‏وأنا هأدخل معاك بيها وأنت وشطارتك بقا وورينى هتعمل إيه ؟
‏_طيب كدا زى الفل وبقينا على أول  الطريق .
‏بص بقا يامعتز أنا هعمل إيه بما إن االسيولة مش  موجودة  فدى عاقبة كبيرة جداً فى  البداية وطبعاً ماينفعش نجيب  قرض من البنك لأن مش عايزين نبدأ حياتنا بالربا .
‏_طبعاً ياوليد ربنا يكفينا شر الحرام ويبعدنا عنه
‏بس مقولتليش هتعمل إيه فى الفلوس ؟
‏_أنا عندى الشقة اللى المفروض أتجوز فيها ومعايا مبلغ برده كنت شايله علشان جهاز ورد .
‏هأبيع الشقهة على المبلغ اللى معايا ونبتدى نحط اساسات للبرج اللى هنعمله . وبعدين نحسب التكلفة المبدأية للبرج وكدا .
‏وتنزل إعلانات لحجز شقق تحت التجهيز ، فى الطبيعى إن الناس هتبتدى تدفع مبالغ وتححز الشقق وبكدا نكون وفرنا مصدر دخل تانى يساعدنا فى البناء .
‏_الله عليك ياهندسه هى دى الدماغ فعلاً .
‏_هههههههههه هو أنا أى حد ولا إيه يابنى لاحظ إنى مش مغرور بس .
‏_اه ما أنا واخد بالى .
‏_المهم أنا كمان ليَّ تعامل مع أصحاب شركات التوريد يعنى مش هيمنعوا إنهم يوردوا لينا أدوات البناء .
‏_بجد فخور بيك ياوليد والله .
‏_الفضل لله ثم بوجودك يامعتز والله ربنا يكرمك .




_أنا استحاله كنت أقدر أبدأ حاجة لوحدى .
_ماتقولش كدا ربنا بيسخرنا أسباب فى حياة بعض
أستأذن بقى ياهندسه علشان العيادة .
_ربنا معاك يارب فى رعاية الله .

_فى إيه حصلت حاجة فى الشركة تانى ؟
_لا مافيش
_طيب روحتى درس أم حمزة ؟
_أيوا .
_ها عجبتك ؟
_اللهم بارك ممتازة وارتحت ليها جداً وقالتلى إنها هتساعدنى فى حفظ القرآن .
وقالتلى كمان إن أكاديمية زاد هتفتح الشهر ده والدراسة هتكون فى أول تسعة إن شاء الله .
_الحمدلله دى أخبار جميلة ، طيب ليه باين على وشك الزعل ؟
هههههههههههه لقيت الاستقالة بتاعته على المكتب النهارده وحتى ما شوفتوش .
_ماتزعليش ياوعد أكيد هو محتاج ياخد هدنة مع نفسه علشان يتقبل اللى حصل .
وأنتِ عملتِ اللى عليكِ وتوبتِ لربنا واعترفتِ ليه كمان
يبقا تركزى فى مستقبلك بقى وحياتك وبلاش تحملى نفسك ضغط أكتر من كدا .
_حاضر ياحبيبتى
سامحينى بالله عليكِ إنتِ كمان لأنى بجد مش عارفه من غيرك كنت عملت إيه .
_ماتقوليش كدا احنا أخوات وبعدين مش عايزاكِ تفتكرى
الماضى واعتبريه صفحة فى حياتك انطوت خلاص .
_حاضر ياميتاب ده اللى لازم يحصل فعلاً علشان اعرف أعيش حياتى من جديد كفايه التعب اللى تعبته ، والحياة اللى كنت بعيدة فيها عن ربنا .

_إيه الأخبار طمنى  عملت إيه ؟
_الحمدلله الدنيا تمام .
خلاص قربنا نشطب البرج ومابقاش غير شقتين اللى مااتباعوش ولا اتحجزوا للإيجار .
_طيب ليه مش عرضتهم للإيجار ولا أنت فى دماغك حاجة معينة .
_ههههههه يعنى بذمتك دى تجى نبقا عاملين برج فى أحلى مكان فى التجمع الخامس وماأحجزش لينا شقتين ؟
_تصدق صحيح راحت عن بالى دى ، بس هنحجز شقق من غير العرايس طيب ؟
_بس كدا نطلع على كارفور نجيب عروستين بينوروا على الأقل مش هنحتاج لنور .
_لا والله تصدق ماكنتش أعرف أنك دمك خفيف كدا .
_ههه دى أقل حاجة عندى ، صبرك بس دا الصبر طيب
دا أنا هابهرك .
_حاضر ربنا يستر بس ومش تهبلنى .
_صحيح يامعتز ؟
_نعم ياوليد .
_احنا البرج بتاعنا قرب ينتهى زى ماقولتلك وبأفكر ندور على قطعة أرض كمان نأسس عليها برج جديد .
_خلاص احنا ندور ونشوف كدا وأكيد هنلاقى إن شاء الله
_إن  شاء الله .
_السلام عليكم .
_وعليكم السلام .
اتفضل يابشمهندس .
_شكراً يا أستاذه .
بس فى كام حاجة حابب تعرفيها .
_إيه هى ؟
_للأسف الشركة فى النازل ولو استمرينا على كدا كمان شهر للأسف االشركة هتنتهى ومايبقاش فى أثر لشركة الشمس خالص .
_إزاى كدا وليه يا بشمهندس ؟
_للأسف ده اللى حصل زى ماقولتلك قبل كدا إنها خسرت اتنين من أقوى المهندسين .
_طيب والحل ؟
_الحل إن المهندس وليد يرجع .
_طيب هو هيوافق يرجع .
_بصراحه مش عارف .
سمعت إنه بدأ شغل جديد خاص به .
‏_دا بجد ؟
‏_أيوه .
‏_طيب والعمل ؟
‏_بصى مافيش حل غير إننا نحاول معاه .
‏_طيب كلمه يابشمهندس عادل .
‏_للأسف مش هينفع .
‏_ليه طيب
‏_أعتقد إنه صعب أقوله كدا لأنى ماأعرفش إيه السبب إنه يسيب الشركة.
‏فأفضل حد يكلمه أو يروحله هو أنتِ .
‏_حاضر هأكلمه ونشوف رأيه إيه ويارب يوافق .
_إيه ياوعد هو أنتِ يابنتى حرام عليكِ لو رجعتى من دروس أم حمزة بتضحكِ هى بتمدك هناك ولا إيه
_أنتِ رايقة أووى .
_فى إيه طيب ، مع إنى شاكه إن الحكاية فيها وليد لأنه بقا علامة مسجلة على وشك .
_بطلى خفه بقا ياست الخفيفه أنتِ .
_هأبطل بس بشرط تقوليلى فى إيه ؟
_الشركة ياستى وضعها فى النازل خالص  ووليد هو الحل إنه يرجع الشركة ومش عارفه أعمل إيه ؟
_طيب والحل ياوعد .
_الحل ياستى إنى أكلمه وأترجاه يرجع تانى .
_طيب خلاص كلميه واطلبى تقابليه واتكلمى معاه .
_حاضر هأطلبه فون وأشوف هيوافق يقابلنى ولا لا لأنى خايفه يرفض يقابلنى .

_السلام عليكم .
_وعليكم السلام .
_مين حضرتك ؟
_أنا وعد الشيخ يا بشمهندس حضرتك فاكرنى .
_طبعاً يا أستاذة .
_كنت محتاجه أقابل حضرتك لو حضرتك مش عندك مانع .
_تحت أمرك يا أستاذة شوفى حابه يكون إمتي ؟
_بكره مناسب لحضرتك ؟
_تمام مناسب جدًا هأكون فى المكتب فى إنتظار حضرتك تقدرى تتفضلى فى أى وقت .
_إن شاء الله بكره الساعة ٣ هأكون عند حضرتك بس ياريت تقولى العنوان
_حاضر هأبعته ليكِ فى رسالة .
فى رعاية الله .
_فى حفظ الله .

_طمنينى عملتِ إيه ؟
_يعنى إنتِ مش سامعه المكالمة كلها ياحشريه أنتِ .
_سمعت بس حابه أطمن .
_أنا بقول تقومى زى الشاطره كدا تنامى .
_حاضر بس مش عارفه ليه حاسه إن وليد ده هيبقي من نصيبك .
_مش قولت تبطلى جنان وتقومى تنامى أحسن لأن أنا لو آخر واحدة فى الدنيا عمر وليد ماهيفكر فيَّ وخاصة بعد اللى عملته معاه علشان كدا بطلى تخرفى وتتخمدى حلو كدا .
_خلاص خلاص بطلنا ياستى .

أنا لقيت ياهندسه قطعة أرض حلوة أوى ومش بعيدة عن البرج بتاعنا وصاحبها شخص محترم أوى ولما عرف إنها ليك وإن والدك المهندس أحمد الله يرحمه قال إن اللى معاه يدفعه  ، والباقى براحته .
وبيقول كمان إنه مستعد يديك الأرض اللى تبنى عليها الأبراج اللى عايزها ويا تدخله معاك شريك يا تديله بتمن الأرض شقق لما البرج يخلص وبعد كدا لو بقا معاك سيولة وحبيت تشتريها منه تشتريها عادى .
_بجد الكلام ده ؟!
_أيوه طبعا .
_الفكرة بجد ممتازة.
سبحان الله ربنا بيفتح لينا أبواب الخير من حيث لاندرى والأجمل من كدا إن معظم الناس بتساعدنى مش لشخصى أنا ، دا لشخص بابا الله يرحمه وأنا فخور بكدا جدا .
_فعلا دى حاجه مشرفة وده الأثر اللى الإنسان فينا بيتركه بعد مايموت تلاقى الناس كلها تفتكره بالخير وربنا يصلح حال ذريته ويقف جانبهم .
_المهم هتعمل إيه معاه فى الشقق ؟
_احنا نديله مقابل الأرض شقق ونخلينا احنا مع بعض مش لازم ندخل شريك تالت .
_كدا تمام يبقا نقابله ولو اتفقتوا نكتب العقد بكره إن شاء الله الساعة ٣ .
_لا بكره فى المعاد ده مش هينفع خالص .
_ليه وراك حاجه ؟
_أيوه الأستاذة وعد جايه بكره تقابلنى .
_وعد !! وعد صاحبة شركة الشمس ؟
_أيوه هى .
_طيب عايزه إيه ؟
_مش عارف بصراحة ، هى كلمتنى وطلبت تقابلنى مش عارف ليه ، أهو هأقابلها وهأعرف إن شاء الله .
_طيب ماقولتليش هتقابل الأستاذ أيمن صاحب الأرض إمتي علشان نخلص معاه ؟
_نقابله الساعة خمسة إن شاء الله .
_تمام كدا بس اعمل حسابك كدا هتحتاج تعمل شركة لأن الموضوع ابتدأ يكبر منك وهيحتاج مقر ثابت لينا .
_إن شاء الله نشوف شقه فى مكان كويس على مساحة كبيرة ونعملها مقر .
_ربنا معاك .
_بالتوفيق إن شاء الله .

_إيه رايحه تقابلى وليد  ؟
_لا هأروح المسجد الأول لأم حمزة علشان عندى اختبار قرآن وبعد ما أخلص هأعدى عليه .
_تمام ربنا معاكِ يارب بس الأدناء ده عسل عليكِ أوووى ومخليكِ قمر ماشاء الله .
_أنا أصلاً يابنتى عسل من غير أي حاجة.
_طيب امشى ياوعد بدل ما أقوم أكلك انتِ أصلا رخمه .
فى رعاية الله .
فى حفظ الله .

_السلام عليكم .
_وعليكم السلام .
_أهلاً ياستاذة نورتى .
_متشكره جدا لحضرتك .
_نبدأ فى الموضوع علشان مش أضيع وقت حضرتك .
_اتفضلى .
_انا عارفه إنك لسه زعلان ومش سامحتنى على غلطتى .
_بس انا مش .... .
_من فضلك سبنى أكمل كلامى
أنت ليك حق إنك تزعل وأنا مش بألومك بجد .
_أنا فعلاً سامحتك من وقت ماقولتلك .
_لو كنت سامحتنى فعلاً ماكنتش قدمت استقالتك وسبت الشغل على العموم ،  أنا مش حابه أعاتب فى اللى فات
أنا جايه لحد عندك ومش هأقولك إن أنا محتجالك تقف جانبى لأن أكيد هترفض .
بس أنا جايه أقولك شركة المهندس مؤمن هتقع وتنهار بمعنى الكلمة ، ومحتجالك لأن زى ما أنت عارف أنا ماعنديش فكره عن الشغل ده .
وإن كان عليَّ مش عايزه لا شغل ولا غيره ، لكن الشركة دى الحاجة الوحيدة اللى من ريحة بابا الله يرحمه وهى اللى شايله اسمه ونفسى ماتقعش .
_بس أنا أنا ... .
_عارفه إن عندك شغل تانى وأكيد لسه محتاجلك لأنه فى البداية.
_بس أنا جيتلك لحد عندك وبأترجاك تقف جانبى وتساعدنى وأكيد هتقدر توفر بين الإتنين والمرتب اللى تطلبه أنا مستعدة أدهولك .
_صدقينى المشكلة مش مشكلة مرتب خالص .
_تقصد تقول إنها مشكلة إنك لسه مش صافى من ناحيتى صح ؟ إنسانى خالص طيب واعتبرها زى ماقولت من شويه خدمة لبابا .
_ليه مصممة تشيلى نفسك ذنب شئ انتهى خلاص انسى اللى فات لأن المشاعر السلبية دى بتهد مش بتصلح .
على العموم سبينى أستخير ربنا وإن شاء الله إن كان خيرا مش هتأخر .
_إن شاء الله ننتظر ردك . السلام عليكم
_وعليكم السلام .
لمتابعة الفصل السابع اضغط هنا 👇
هل اعجبك الموضوع :

تعليقات