القائمة الرئيسية

الصفحات

حوار صريح مع المؤلفه ماما سيمي 

حوار تكشف فيه ماما سيمي ادق التفاصيل 


ومعانا ومعاكم كاتبتنا الصاعدة "ماما سيمي" ونبتدي بأول سؤال متعودين نسأل كتابنا بيه 
وهو إسمك الحقيقي إيه؟

_ اسمي سماح مواليد 81

وياترى ليه اختارتي الأسم ده تحديدا..؟ 
_  بصراحة مكنتش حابة ادخل عالم الكتابة بأسمي الحقيقي ولازلت لغاية دلوقتي! 

ليه اقدر اعرف؟ 
- اسباب شخصية احب احتفظ بيها لنفسي. 

هل ليكي ألقاب أخرى؟
_  هههههههه لأ مفيش بس كان في بنت من قرائي في كومنت علقت بيه على رواية ليا بتقولي انتِ المفروض تلقبي بملكة الأبداع بس حقيقي انا شايفة انه لسه بدري على اللقب ده..! 

ماهي حالتك الإجتماعية ومكان إقامتك؟ 

متزوجة واقيم في مصر ! 

امتى اكتشفتي موهبتك في الكتابة؟ 

_ من زمان قوي لما كنت بكتب مواضيع التعبير وانا في المدرسة كنت ديمًا ما بأقلش عن تسعة من عشرة واحب اختار الفاظ بلاغية جديدة تضيف للموضوع صورة جمالية، دا غير شلال الافكار المنصب في عقلي كنت تقريبًا مبعرفش انام من تزاحم الافكار في دماغي.. وبردو تقدري تقولي اني مش جريئة اجتماعيًا فا اكتر حاجة بعرف اعبر بيها هى الكتابة.. وبدأت كتابة أول رواية ليا من 22 سنة وانا في تانية دبلوم والحمدلله وقتها نالت اعجاب صديقاتي في المدرسة لدرجة انهم كانوا بيطلبوا مني اكتب باستمرار عشان يقروا قصصي علي طول! 

مين شجعك على النشر الإلكتروني؟

انا وكان قرار وليد لحظة شغف لأني حبيت اعرف رد فعل البنات في كتاباتي وهل هقدر اوصل هدفي من خلال رواياتي أو لأ! 

أول روايات كانت إيه ومن إمتى كتبتي؟

زي ما قولتلك فوق كانت رواية حبيب بدرجة مخادع ودي كانت بدايتي بس الرواية دي متنشرتش الكتروني لغاية دلوقتي، لكن اول رواية الكتروني نشرتها هى تضحية اسعدتني في 2018..! 

قدمتي كام رواية ونوفيلا في الفترة دي؟ أذكريهم بالأسم! 

رواية
تضحية اسعدتني
ليست وحدها حبيبتي 
زواج لرد الجميل 
قلب حبيبتي 
خائنة لا تطلب الغفران 
عهد الغادر "قيد الكتابة"
عشق بطعم الدماء جزء تاني لخائنة "قيد الكتابة"

قصص قصيرة
يكفيني فخرًا انكي امي
ضحية طلاق
نظرات خاطفة
هذا جناه ابي
سند من سراب 

إيه المشاهد اللي خليتك تبكي وقت كتابتها؟

- يوه كتير جدًا تقريبًا في كل رواية لازم يكون في مشهد ابكي وانا بكتبه زي مثلا موت جميلة ومالك في ليست وحدها حبيبتي وكمان لحظة اكتشاف إيمان وهى طفلة مجزرة موت اهلها في خائنة لا تطلب الغفران وكمان مازن في قلب حبيبتي لما تالا حبيبته اتكتب كتابها على ابن خاله وهو راح يعيط قدام قبر مراته، حقيقي مشاهد كتير كل رواية لازم اتأثر بيها وابكي في بعض اجزائها والحمدلله مفيش موقف بكيت فيه الإ وقرائي الاعزاء بكوا زيي تقريبًا بيتعدوا مني  

إيه القضية القادمة اللي حابة تناقشيها؟

_انا مقدرش احدد ايه هى بالظبط لأن ممكن يجي في بالي فكرة او مشهد او اشوف قدامي موقف حصل حقيقي يخليني ابني عليه مناقشة مشكلة جديدة والحمدلله انا ناقشت مشاكل كتيرة زي مشاكل ضحيا الطلاق، وخيانة الوطن، وتعدد الزوجات، والتسرع في الحكم الخطئ في القرارت المصيرية، اهمال الاسر لولادهم، فقدان الحبيب، تسلط الزوج او الزوجة، وخيانة العهد، التنمر، الحمدلله اتكلمت عن دول كلهم وربنا يقدرني واتكلم عن مشكلات تانية موجودة ونقدر نساعد في حلها! 

إيه هي هواياتك الأخرى؟

غير الكتابة القراية طبعًا وبس 

لو قولتلك اختاري رواية من أعمالك للنشر الورقي هتختاري إيه؟

هختار رواية " خائنة لا تطلب الغفران"
لأنها اكتر رواية ارهقتني في كتابتها وناقشت فيها مشكلات كتير زي خيانة الأهل والوطن وفساد زوي السلطة، وحب الوطن والحفاظ على ارضه وكل ما فيه وكمان اظهرت فيها البطلة القوية اللي ميأستش وفضلت مصرة على الثأر لدم اهلها رغم مرور الزمن.

أجواءك المفضلة وقت الكتابة؟

_ مج قهوة كبير وغرفة ذات أضاءة هادية وهدوء بس! 

هل في شخصيات في رواياتك اخدتيها من الواقع؟

اه فيه في ليست وحدها حبيبتي شخصية هند وزياد.

هل بعد ما كتبتي رواية من وحي خيالك اكتشفتي ان ليها شبيه في الواقع بالصدفة؟

في نظرات خاطفة بنت في الخاص قالت ليا أن هى وخطيبها أول قصة حبهم كانت نظرات صامته بس خاطفتهم من بعضهم زي ما حصل في قصتي، وفي قلب حبيبتي كمان بنت قالت ليا انها كانت بتحس باللي بتحبه من غير ما تشوفه او تعرف عنه حاجة يعني تحس بضيقه وفرحه زي تالا ومازن وبرغم انها مزرعتش قلب زي تالا.

مين في بطلاتك يشبهك في الحقيقة؟

سارة في تضحية ايعدتني استلهمتها من شخصيتي وردود افعالي. 

إيه التفصيلة اللي انتي دايما حريصة تكون موجودة في رواياتك وبتحسي انها بتعبر عن شيء في شخصيتك؟
_ الدفئ والترابط الاسري بحب ديمًا اخلي فيه ترابط  وحب وتضحية زي الحكمة اللي بتقول الكل للواحد والواحد للكل مفيش فرق بين صغير وكبير. 

لو حبينا نصنف نوع رواياتك.. هيكون تصنيفك إيه؟

رومانسي نظيف، درامة، اكشن، اجتماعي وكل دول ذات طابع ديني الحمدلله

بيأثر فيكي النقد سلبي أو إيجابي؟

الإيجابي بيديني دفعة لقدام وحماس واصرار على المواصلة، السلبي بحاول اتعلم من اخطائي عشان مقررهاش. 

جالك نقد على رواياتك قبل كده؟

اكيد واكتر رواية انتقدت ليا هى ليست وحدها حبيبتي عشان القراء مش متخيلين أن زياد وبعد حبه الجميل والمخلص لجميلة انه يحب هند بعد وفاتها بس انا حبيت ابين أن الحياة مبتقفش لموت حد والا كانت وقفت بموت النبي عليه افضل الصلاة والسلام. 

اجمل التعليقات اللي جتلك إيه هي؟

حقيقي جالي تعليقات كتيرة حلوة جدًا بس اكتر تعليق معلق معايا زي ما ذكرت فوق من بنت رقيقة قالت ليا تستاهلي لقب ملكة الأبداع عن رواية خائنة لا تطلب الغفران. 

إيه الأطعمة اللي بتفضليها على سفرتك؟

المشويات والمحاشي البشاميل والمعجنات بأنواعها. 

والأطعمة اللي بيفضلها زوجك؟

زي اي زوج مصري اصيل المحشي والرز والخضار بأنواعه. 

رسالة تحبي تقدميها لمتابعينك؟

شكرًا يا احلى قراء في الدنيا حقيقي انتم هرمون سعادة اي كاتب سواء بمتابعتكم لأعمالنا أو تعليقاتكم عليها حقيقي بتعوضونا عن ساعات التعب اللي بنقضيها في كتابتها وشكرًا لكل حد علق بكلمة حلوة عشان بيديني الثقة في نفسي للأستمرار ولكل حد انتقدني بأدب عشان احاول اصلح أخطائي واطور من نفسي واسلوبي. 

ولو هتقولي ليهم عتاب هيكون ايه؟

لو هتنتقدني انا مش هعترض بس فضلًا بدون تجريح أو تقليل مني لكي يستمر ادب الحوار بينا، وكمان للمتابعين في صمت رجاء عبرونا بكلمة. 😅😅😅

في نهاية الحوار.. إيه اتغير فيكي بعد ما بدأتي تكتبي وتنشري إلكتروني؟

_بقيت اهدى كتير من الأول لأن الكتابة بتخف الضغط العصبي والنفسي اللي جوايا، استقريت نفسيًا والطاقة السلبية بخرجها مع الكتابة والحمدلله بقيت نسبيًا بعرف اطرح حلول للمشكلات اللي بناقشها واخيرًا السعادة اللي بحسها مع نهاية كل عمل ينجح وينال على اعجاب القراء. 

وفي الأخير بتمنى للجميع النجاح والسعادة في حياته ولو عندك هدف اسعى ديمًا لتحقيقه ومتقولش فات الأوان، لأن انا مقتنعه جدًا بالحكمة دي (أن تأتي متأخرًا أفضل من أن لا تأتي ابدا) ويارب اكون كنت ضيفة خفيفة عليكم متابعيني الأفاضل، بحبكم في الله.




هل اعجبك الموضوع :

تعليقات

6 تعليقات
إرسال تعليق
  1. تستحقى لقب ملكه الإبداع يا موحه

    ردحذف
  2. ربنا يخليكي يا حبيبتي تسلميلي ويسلك ذوقك 😍😍😍😍😘😘😘😘😘❤️❤️❤️❤️❤️

    ردحذف
  3. حبيبتى انتى تستحقى كل الخير... و بجد روايات جميلة و راقيه... و اختيارك للاحداث و الكلمات و الشخصيات جميل اوى... انا بقى ممكن اسميكى صاحبة القلم الراقى.... ربنا يوفقك

    ردحذف
    الردود
    1. حبيبتى انتى تستحقى كل الخير... و بجد روايات جميلة و راقيه... و اختيارك للاحداث و الكلمات و الشخصيات جميل اوى... انا بقى ممكن اسميكى صاحبة القلم الراقى.... ربنا يوفقك

      حذف
    2. هههههههه جيت اعمل نسخ لردي على كومنتك نسخة كومنتك انتي مش مركزة لسه صاخيم من النوم

      حذف
    3. Asmaa Essam
      حبيبتي صاحبة الاخلاق الراقية ربنا يبارك فيكي ويخليلك حبايبك يا قلبي تسلميلي على كلامك الجميل زيك. 😍😍😍😍😘😘😘😘❤️❤️❤️❤️❤️❤️

      حذف

إرسال تعليق