القائمة الرئيسية

الصفحات

شريهان سماحة في حوار كأنك تعرفها لاول مره

شريهان سماحة في حوار كأنك تعرفها لاول مره 

شريهان سماحة 

كاتبه وروائيه ولها العديد من الروايات والقصص القصيره 

شريهان سماحة في حوار كأنك تعرفها لاول مره


س/ اسمك، وسنك، وتعليمك، ومهنتك، والحالة الاجتماعية، لونك، واكلتك، وفاكهتك ؟ 

ج.. اسمي في البطاقة "نهاد" وفي العيلة وبين الأهل "شريهان" وبصراحة بحبه أكتر يمكن عشان كبرت وتعودت عليه ..
سني .. أنا مواليد ١٩٨٦/١٢/٢٠ يوم خميس وتصادف ميلادي يوم عيد اضحى المغرب "يعني بعد ماما عيدت أهو 😁😂"
تعليمك .. ثانوي تجاري ثم بكالوريوس علوم وتربية قسم تعليم تجاري.  
مهنتي .. مُعلمة لدى احدى المدارس الثانوية التجارية وكنت بمتحن دورات حاسب ألي ولغة مهمة لشغلي ومطلوبة مني من زمان .
متزوجة .. و رُزقت بيوسف وعمر تؤام ..
لوني المفضل .. عموما بحب الالوان الهادية اللي مش ملفتة بشكل مبالغ للنظر زي مثلا السماوي والبينج الهادي الموف الهادي الفيروزي الألوان الغامقة وهكذا ..
فاكهتي .. أنا من صغري ما بحبش الفاكهة سبحان الله جسمي بقشعر منها بس لما خلفت جسمي ضعف بقيت غصب عني اخد الفاكهة اللي طعمها هادي شوية وما يزودش نفوري منها زي الموز والبرتقال واليوسفي والجوافة والتفاح والباقي بحاول اشربه عصير وخلاص ..
اكلتي المفضلة أول عشق ليا هو السمك بكل أنواعه خاصة المشوي ويليه محشي ورق العنب والكرنب وكباب الرز ..
شريهان سماحة

-----------------------------

س/ اسباب اتجاهك للكتابة، ومتى تم اكتشاف الموهبة وفي أي سن ؟!

ج .. من ضمن أهم اسبابي وأولها أن بتعصب للظلم والدين وكنت بحس اني متقيده مبعرفش اعبر عن رأي .. الكتابة بس اللي لقيت فيها أن اعرف .. تاني حاجة أن بعد ولادة التؤام والمسئولية الكبيرة اللي شلتها لوحدي بعد فضل ربنا عليا (بسبب أن متزوجة بعيد ماما وكمان حماتي كبيرة في السن متقدرش لمراعاة الأولاد معايا ) انعزلت تقريبا عن الناس والحياة الاجتماعية الطبيعية والهادية .. بدأت ادخل في بدايات اكتئاب وخاصة لما بدأت الأولاد تكبر وشقاوتهم تظهر وتدمر شقتي بالمعنى الحرفي وبدون مبالغة ..
تالت حاجة أن كل شخص على وجه الأرض مبتلي في شيء "حاجة حبه احتفظ بيها لنفسي" و ده سبب برضه لدفعي للكتابة خاصة أن عمري ما كان ليا ميول للكتابة لأن عصبية وخلقي بضيق بسرعة والكتابة عكس كده خالص عاوزه طول بال وتركيز شديد ويكاد يكون الشخص منعزل عن الواقع و العالم اثناء الكتابة..
اكتشفت صدفة حكاية قراءة الروايات الالكترونية " عن طريق رواية اغتصاب تحت سقف واحد لدعاء عبدالرحمن " 
حبيت جدا لون الكتابة ده ولقيته فيه شبة كبير من شخصيتي وفكري وميولي .. وتوالى الاوضاع على كده أن اقرأ لتعويض خروجي وحبستي في البيت مع الأولاد بسبب شقاوتهم الزايدة ..
اكتشفت أمتى أن بعرف اكتب ..
هو أولا وأخيرا توفيق من ربنا واحده لأن كتابة رواية كاملة بحبكتها وطريقة صياغة مشاهدها حاجة صعبة بجد وارهاق ذهني شديد عشان بتبقي في تشتت ما بين واقعك وخيالك وبالتالي ممكن أي حاجة تقع منك اثناء الكتابة ولكن توفيق الله هو وحده المعين ..
ثانيا أختي سماح "ماما سيمي" في يوم بعتتلي رواية "عطر فرنسي" ل د/ رابعة علي وقالتلي أنها جميلة جدا .. 
قرأتها وبصراحة دخلتني في مود جميل لدرجة أن كان معايا وقتها فكرة معذب في خيالي خلتني احرك إيدي واكتبها بعد ما كنت مقتنعة من شهور قبلها بأن أدي الفكرة لأي كاتبة وهي تكتبها ..
وقد كان كتبت جزء كبير من معذب على اساس معرضهاش بس رجعت تاني لما شفت تعبي فيها قررت اعرضها ..
ومن خلال أراء المتابعين بس حسيت أن بعرف أكتب عشان كده بقول لكم أن تفاعلم بيفرق كتير لأي كاتب خاصة لو أنتم شايفين فيه موهبة بجد .. 
عمري في الكتابة من سنتين بس يعني من سن ٣١ بدأت ..

---------------
س / ما هي طقوسك للكتابة وكيفية ايجاد فكرة للرواية وتنظيمها، ومن أي مصدر أخذت المعلومات الدينية في كتاباتي ؟
ج .. بالنسبة للطقوس مش عارفة هتصدقوني ولا لا بأن بكتب على الفون في وسط عركة الولاد مع بعض اللي بتطير التلفيون من إيدي مئات المرات أو وأنا بجبهم من المقر الرسمي لتجمعتهم الجهنمية "أقصد التلاجة أو فرن البوتجاز يعني🙄" أو بيعملوا أي كارثة تتخيلوها من خلع سيراميك أو لعب في الميا رغم أن بكون واخدة احتياطاتي من قفل الأبواب وكده بس معرفش بيسلكوا ازاي 😭 .. يعني من الأخر مافيش طقوس هادية خالص عندي وبكتب بستر ربنا 😁 أه والله زي مابقولكم كده 😂
كيفية إيجاد فكرة .. أنا ببدأها الأول بالهدف يعني أنا عاوزة أوصل لحضراتكم إيه وبناء عليه بعمل الفكرة وبدخل في الكتابة وهي مش كاملة في دماغي بنسبة ٦٠% .. أو معايا مجرد افكار عامة ومشاهد بسيطة جدا .. يعني اقرب مثال العميل كنت بفكر المشاهد هتكون إيه واكتب كمان خلال الاسبوع اللي كنت باخده بس ..
بالنسبة للمعلومات الدينية الي استعنت بيها في روايتي لغاية دلوقت هي مجرد معلومات اعرفها في حياتي اليومية ووقت الكتابة اتأكد اكتر من صحتها واسجلها ..  أما المعلومات الدينية العميقة بمتنع عنها لأن مؤمنة أن متكلمش في حاجة بخصوص ديني معرفش عنها حاجة أو مش متأكدة منها عشان الذنب وكده..

---------------------

س/ هل كل ما نقرأه في الروايات من حب وأخوه حقيقي، وما هو كاتبك المفضل، وازاي بنمي موهبتي وبنظم وقتي؟

ج .. بالنسبة لأول سؤال مقدرش أجزم باليقين أن جو الروايات حقيقي و برضه مقدرش أجزم بأنه مفيش من الحقيقة لأن كل كاتب بيكتب من منظور مراحل حياته والفكر اللي مقتنع بيه يعني أنا مثلا بحب الختام السعيد عكس الحقيقة وده لإيمان مني بأن القراء بيهربوا للرواية عشان تعوضهم عن تعبهم وارهاقهم طول اليوم ومشاكل حياتهم فمجيش أنا ازعلهم واعكنن عليهم أكتر وبحرص أن يكون ده جو اطار تشويق ورومانسي واحداث تخليهم منجذبين للرواية لأخر سطر بفضل الله ..
كاتبي المفضل اللي بقرأ لهم باستمتاع .. د/خولة حمدي .. د/منى سلامة .. محبوبة محمد سلامة .. مصطفى صادق الرافعي.. دعاء عبدالرحمن .. رابعة علي ..  بالأضافة لبعض الكتاب الأجانب كتشخيوف وبران داون ..
بنمي موهبتي ازاي .. بصراحة من يوم ما بدأت كتابة وأنا القراءة قلت عندي لدرجة الربع وده بسب قلة الوقت عندي من كتابة لمسئولية البيت والشغل والامتحانات والاولاد ..
بحاول اعوض ده بقراءة بعض الاقتباسات والقصص القصيرة ..
تنظيم الوقت ما بين كتابة وبيت ودراسة .. بجد أنا فاشلة في نقطة التنظيم دي ولازم حاجة في أكتر الأيام تفوز على حاجة تانية غصب عني ..

--------------

س / أكتر شخصية من كتابتي قريبة مني، وشخصية تمنيت أكون مكانها ..

ج .. كل شخصية من كتابتي قريبة مني بجد وأكترها هنا "بس مش لدرجة مثاليتها لأن كل شخص ليه عيوب ومميزات أكيد "

شخصية اتمنيت اكون مكانها بصراحة ممكن هنا أو مرام ..

-----------------------

س/ هل بهدف للورقي .. وهل يمكن اضافة الفانتازيا لقلمي .. وجزء تاني من معذب أو ثالث لأحفاد ؟

ج… هكلمكم بصراحة في نقطة الورقي .. هو مش شيء سيء بالعكس هو حاجة كويسة جدا ومشرفة وعشان هو كده أنا عمري ما هسعى ليه إلا بفكرة وهدف يليق بيهم بأذن الله وتوفيقه.. يعني مش لمجرد أن نشرت وعملت ورقي وخلاص .. عاوزة أعمل بمشيئة الله بصمة خاصة بيه .. قد يكون ده حلم ولكن نسأل الله التساهيل والتوفيق وراضية لو ده متحققش لأن الكتابة ومازالت عندي هواية لا أكثر ومتعدتش عندي للمهنية والتفرغ الخالص لها ..

اضافة الفانتازيا لقلمي .. هو صعب ليا ومبرتحش في النوع ده ولكن لعل الله يريد لي في يوم من الأيام غير كده .. فمقدرش اجزم بالرفض المطلق ..

جزء تاني لمعذب بصراحة فكرت بس هيكون خاص بالأطفال لما تكبر ..(لسه مجرد خاطرة) 

جزء تالت لأحفاد ما أظنش بصراحة لأنها استوفت الهدف ممكن بعض المشاهد بين الأبطال وتكون تمام على كده ..

------------------------

س/ الحب في حياة شريهان وهل زوجي من متابعيني، وكيف يتم التوافق بين الكتابة والحياة اليومية، وما هي طبيعية شريهان سماحة، وهل هناك توافق بين شخصياتي الروائية وشخصي الكريم ؟

ج… الحب والاهتمام والاحترام بالنسبة ليا مهمين جدا جدا لأن أنا بطبعتي بخاف على مشاعر الغير وحنونة وعاطفية وما يشترطش هنا حب بين راجل وست بس لا بين أخواتي أو أهلي أو أي شخص غريب اقابله باستثناء الاشخاص اللي مابرتحش ليهم من أول مرة أو بيظهروا ليا شيء وفي باطنهم شيء تاني خالص ..

للأسف زوجي مش متابعيني ولا من متابعين أي كاتب لأنه ملتزم شوية ورافض موضوع الكتابة ده خالص ولكم أن تتصوروا المسئولية اللي بتقع عليا عشان أوفق بين جميع مسئولياتي ووقتي للكتابة عشان رضى متابعيني كمان ( معاناة بجد لأن بحاول اراضي الجميع بس للأسف ده بيتتحق بس على حساب نفسي) ..

طبيعية شريهان سماحة .. كتومة .. منعزلة .. ضعيفة .. خجولة .. قوية وشرسة في الحق وعند ظلم أي شخص قدامها .. مثقفة .. عاطفية .. رومانسية .. عصبية .. حنونة .. دموعها قريبة جدا .. عمري ما تمنيت أي اذاي لأي شخص حتى وإن كان ظالمني بفوضه لربنا ياخدلي حقي .. فيها روح طفلة بس مبطلعش مع أي حد بصراحة .. طيبة بس عند الكرامة والاهانة بنسحب فورا ومن غير تردد .. عفيفة النفس .. تلقائية اللي في قلبها على لسانها .. 

هل هناك توافق بين شخصيتي وشخصياتي .. بصراحة جدا كل شخصية واخده مني حاجة .. هنا ردودها في الدين والنصح 
خديجة خجلها وهدوءها .. مزيج مرام من ضعفها واصرارها وقوتها ..

-----------------------

س/ في مشهد من كتاباتك بتشعري أنه بيمثلك، وإيه المشاهد اللي أثرت في متابعيني، وهل في شخصية من الواقع في كتاباتي، وإيه أقرب رواية لقلبي، وهل في رواية بعد ما نزلتها اتمنيت اعدلها واضيف عليها تاني، وطموحي بالنسبة للكتابة ؟

ج… مشهد محدد لا لأن كلهم بكتبهم بكافة مشاعري وخلاصة من قلبي يعني كلهم مأثرين فيا قوي ..

المشاهد اللي مأثرة في المتابعين .. ده سؤال معرفش أجاوب عليه لأنه خاص بكل متابع قرأ ليا ..

شخصية من الواقع كتبت عنها .. بصراحة أيوة في (أمير) (وولي عهد النرويج في قسم ولي. العهد)  والباقي من وحي خيالي ..

أقرب رواية لقلبي .. بصراحة أحفاد والعميل لأنهم بيتكلموا عن الدين أكتر فبالتالي أي حاجة خاصة بديني تفوز ..

هل في رواية بعد نزولها اتمنيت اعدلها .. لا الحمدلله لأن مبعرفش أكتب حاجة مش حباها أو مش من قلبي وبالتالي راضية عن كل اللي نزلته ..

طموحي بالنسبة للكتابة .. أن أفضل اوصل لكم هدف راقي وقلم ترحبوا بيه بين أولادكم .. سواء الكتروني أو ورقي مش هتفرق معايا ..

------------------------

أخر سؤال س / شعورك بعد حب الناس والمتابعين ليا ؟
ج… مع أن اللي بيتابعوني قليل بس اقسم بالله فرحانة بيهم جدا وعندي احسن من الف عدد ربنا يبارك فيهم ويسعد قلوبهم على وصالهم الجميل والفاضل في حقي ..

-----------------

أنا حرصت أجاوب على كل الاسئلة باستفاضة واتمنى ميكونش نسيت أي سؤال سهوا .. 
وأخيرا سعيدة بوقتي في الاجابة لأن حسيت أن فتحت قلبي مع أجمل أخوات ومتابعين 💞

لا تنسوني بدعواتكم لي بظهر الغيب بصلاح الحال والأحوال لي ولكم ولجميع المسلمين ..






هل اعجبك الموضوع :

تعليقات

3 تعليقات
إرسال تعليق
  1. حوار جميل استمتعت بيه وانا بعرفك عن قرب اتمنالك النجاح دايماً مع تحقيق كل ما تتمني

    ردحذف
  2. حبيبتى يا شيرى كان نفسى اعرفك اكتر... ربنا يسعد قلبك و ييسر لك امرك... و يهديلك اولادك.. و تحققى كل اللى نفسك فيه😍♥♥♥

    ردحذف
  3. انتي انسانه جميله ورائعه بصراحة وبحترمك جداا رواياتك جميله جداا وخصوصا احفاد التعلب بإلتزامة بصراحة كنتي دقيقه بامور للدين ويا ريت لو نقرأ لإلك روايه تانيه دينيه بحب التزامك في الكلام وتغاضيت ان اي وصف مشاعر مع انه شرعا ما بيجوز نوصف بس اسلوبك سردك احداثك ولا اروع ربنا يبارك فيكي وبأولادك ويهديهم لإلك يا رب ويجعلهم من الصالحين المصلحين في الامة ويفرحك فيهم يااا رب

    ردحذف

إرسال تعليق